ÁLYKTUN Ungir jafnaðarmenn þakka Ágústi Ólafi Ágústssyni, varaformanni Samfylkingarinnar og félaga í UJ, vel unnin störf á Alþingi og innan flokksins. Ágúst hefur tilkynnt að hann hyggist ekki sækjast eftir endurkjöri til Alþingis eða til varaformennsku í flokknum
ÁLYKTUN Ungir jafnaðarmenn þakka Ágústi Ólafi Ágústssyni, varaformanni Samfylkingarinnar og félaga í UJ, vel unnin störf á Alþingi og innan flokksins. Ágúst hefur tilkynnt að hann hyggist ekki sækjast eftir endurkjöri til Alþingis eða til varaformennsku í flokknum.
Ágúst hefur á þingferli sínum verið óþreytandi baráttumaður fyrir jafnaðarstefnunni og í störfum sínum lagt sérstaka áherslu á þá málaflokka sem minni athygli fá í umræðunni. Vorið 2007 varð frumvarp hans um afnám fyrningarfrests í kynferðisafbrotum gegn börnum að lögum, við mikinn fögnuð þjóðarinnar. Með lögunum varð Ísland fyrsta land heimsins til að stíga þetta mikilvæga skref í þágu réttlætis. Ágúst hefur verið ötull talsmaður jafnréttis og mannréttinda á þingi, en hefur einnig látið mikið til sín taka í efnahagsmálum, nú síðast sem formaður viðskiptanefndar Alþingis. Hann hefur talað röddu heimilanna, aldraðra og unga fólksins, til dæmis hvað varðar lægra matvælaverð, hærri persónuafslátt og ýmis velferðarmál. Loks hefur hann verið í fremstu víglínu þegar kemur að samskiptum Íslands og Evrópusambandsins, meðal annars sem annar leiðtoga nefndar ríkisstjórnarinnar um þróun Evrópumála.
Ágúst Ólafur var formaður Ungra jafnaðarmanna á árunum 2001 til 2003 og hefur æ síðan verið stoð og stytta ungu fólki, bæði í Samfylkingunni sem og utan hennar. Framganga hans á Alþingi hefur brugðið ljósi á mikilvægi þess að ungt fólk hafi þar rödd, sem talar máli þeirra sem munu erfa landið. Ungir jafnaðarmenn þakka Ágústi kærlega fyrir samfylgdina og óska honum velfarnaðar í þeim verkefnum sem hann mun nú taka sér fyrir hendur.
