„Er ekki kominn tími til að ríkisstjórnin, sem skipuð er sömu flokkum og settu okkar á lista viljugra þjóða, biðjist afsökunar á því að eiga þátt í morðum á saklausu fólki,“ spyr Natan Kolbeinsson, stjórnarmaður í Ungum jafnaðarmönnum, í grein sem birtist á Vísi í dag.
Natan gerir að umtalsefni væntanlega afsökunarbeiðni Jeremy Corbyn, nýs leiðtoga Verkamannaflokksins, á þætti flokksins í Íraksstríðinu. Natan spyr hvort það sama eigi ekki að gilda um Sjálfstæðisflokkinn og Framsóknarflokkinn, en sem kunnugt er ákváðu formenn þeirra árið 2003 að setja Ísland á lista hinna viljugu þjóða.
Innrás Bandaríkjanna í Írak átti mikinn þátt í að skapa það ófremdarástand sem nú ríkir þar og í löndunum í kring, þar sem hryðjuverkasamtökin ISIS hafa náð fótfestu og milljónir manna hrakist á flótta. Þrátt fyrir þetta hefur enginn Íslendingur beðist afsökunar á þætti sínum í málinu.
„Er ekki líka kominn tími á það að við hættum að móta utanríkisstefnu okkar út frá peningum og förum að móta hana út frá mannúð og friði,“ spyr Natan að lokum.
