Um daginn fór ég að skoða sýningu Aflvaka um uppbyggingaráform í miðborginni. Áður en ég gekk inn í Bankastræti 5 var ég þess fullviss að miðborgin ætti bjarta framtíð fyrir höndum en eftir að ég kom út hafði ég styrkst í þeirri trú minni. Möguleikarnir og tækifærin eru nær endalaus. Um daginn fór ég að skoða sýningu Aflvaka um uppbyggingaráform í miðborginni. Áður en ég gekk inn í Bankastræti 5 var ég þess fullviss að miðborgin ætti bjarta framtíð fyrir höndum en eftir að ég kom út hafði ég styrkst í þeirri trú minni. Möguleikarnir og tækifærin eru nær endalaus.
Það gerist í Reykjavík…
Meðal þeirra hugmynda sem hafa vaknað er að stækka Sundhöllina, byggja á Slippasvæðinu, reisa íbúðir- og verslanir þar sem áður voru Stjörnubíó og Austurbæjarbíó og byggja atvinnuhúsnæði fyrir 2 þúsund manns á Höfðatorgi. Fjölmörg ný hús eiga að rísa við Laugaveginn, til dæmis á 22a, 35 og 40. Hugmyndir eru um að byggja veitingaskála í Hljómskálagarðinum, stækka Hótel Borg og gera nýja göngugötu milli Austurstrætis og Skólabrúar. Þá er áformað að opna tónlistar- og ráðstefnumiðstöð við Austurhöfnina árið 2008. Áfram á að endurnýja göturnar í miðborginni; til dæmis á að ljúka við að fegra Skólavörðustíginn og grafa upp Suðurgötu milli Vonarstrætis og Skothúsvegar. Hugmyndir eru um að reisa bílastæðahús á nokkrum stöðum í miðborginni; endanleg ákvörðun um staðsetningu hefur ekki verið tekin, fyrir utan að ljóst er orðið að neðanjarðarbifreiðakjallari verður á Stjörnubíósreitnum. Og þá má geta þess að framkvæmdir eru þegar hafnar við byggingu glæsilegs hótels á horni Aðalstrætis og Túngötu og við gerð 250 nýrra íbúða í Skuggahverfinu.
Miðborgin tekur stakkaskiptum
Þær hugmyndir og framkvæmdir sem hér hafa verið raktar eru aðeins dæmi um hvað er á döfinni – margt fleira mun gerast í hjarta Reykjavíkur á næstu árum. Það er því ljóst að miðborgin mun taka stakkaskiptum í náinni framtíð og var enda kominn tími til að mál kæmust þar á hreyfingu.
Fleiri greinar boðaðar…
Á næstu vikum mun ég fjalla um margvíslegar hugmyndir hér á Pólitíkinni sem ég hef um framtíð miðborgar Reykjavíkur. En áhugasamir lesendur verða að bíða um stund eftir að fá meira að heyra því að þetta er nóg að sinni.
