Tillaga Ungra jafnaðarmanna að stefnu Samfylkingarinnar í málefnum Lánasjóðs íslenskra námsmanna byggir á áherslum Landssamtaka íslenskra stúdenta. Samkvæmt tillögunni á útborgun lána að breytast í mánaðarlegar greiðslur og grunnframfærsla og frítekjumark að hækka í samræmi við launaþróun. Þá er áhersla lögð á að efla hlutverk Lánasjóðsins sem félagslegur jöfnunarsjóður og að lög um Lánasjóðinn verði einungis endurskoðuð í samráði við hagsmunasamtök stúdenta.
Stefna Samfylkingarinnar í menntamálum hefur hingað til rímað vel við áherslur stúdentahreyfingarinnar. Tillaga Ungra jafnaðarmanna er tilraun til að skerpa enn frekar á félagslegum áherslum flokksins í málefnum Lánasjóðsins og styðja við baráttu stúdenta.
Tillagan í heild sinni:
Samfylkingin vill efla hlutverk Lánasjóðs íslenskra námsmanna sem félagslegur jöfnunarsjóður. Í því skyni vill Samfylkingin innleiða stykjakerfi þar sem hluti láns breytist í styrk að námi loknu.
Til að Lánasjóðurinn geti sem best sinnt hlutverki sínu sem félagslegur jöfnunarsjóður leggur Samfylkingin áherslu á eftirfarandi atriði:
- vextir af lánum haldist lágir og ekki verði fallið frá tekjutengingu afborgan
- ekki verði sett takmörk á aldur lánþega
- útborgun lána verði mánaðarlegar greiðslur í stað eingreiðslna
- skilyrði um lánshæfi stúdenta verði endurskoðuð með tilliti til jafnréttis til náms
- frítekjumark námsmanna hækki í samræmi við launaþróun
- grunnframfærsla námsmanna miðist við 100% af grunnviðmiði neysluviðmiða Velferðarráðuneytisins og hún haldi í við launaþróun
- framfærsla íslenskra námsmanna erlendis verði endurskoðuð með það fyrir markmiði að bæta kjör þeirra
- stuðningur við fjölskyldufólk í námi verði aukinn og framfærsla barna tryggð óháð námsframvindu foreldra
- lágmarksnámsframvindukröfur verði lækkaðar aftur í 18 ECTS einingar
- Lánasjóðnum verði tryggt fjármagn til að geta staðið undir fullnægjandi þjónustu við skjólstæðinga sína
- Lög um Lánasjóðinn verði einungis endurskoðuð að höfðu samráði við hagsmunasamtök námsmanna.
