Stofnfundur Ungra jafnaðarmanna á Seltjarnarnesi telur vanrækslu ríkisstjórnarinnar við börn með geðraskanir fullkomlega ólíðandi. 170 börn bíða nú eftir plássi hjá Barna- og unglingageðdeild Landspítalans og er
meðalbiðtíminn um eitt og hálft ár. Á fundinum var Helga Tryggvadóttir kjörin formaður félagsins. Nýtt aðildarfélag Ungra jafnaðarmanna, ungliðahreyfingar Samfylkingarinnar, var stofnað í Félagsheimilinu Seltjarnarnesi þriðjudagskvöldið 24. apríl.
Félagið ber nafnið Ungir jafnaðarmenn á Seltjarnarnesi (skammstafað UJSEL) og er vettvangur ungs Samfylkingarfólks á Seltjarnarnesi til að koma hugsjónum sínum á framfæri og berjast fyrir jöfnuði og frelsi.
Nýkjörinn formaður félagsins er Helga Tryggvadóttir læknanemi. Auk hennar sitja 7 ungir Seltirningar í stjórn félagsins:
Halla Tryggvadóttir
Halldór Hrafn Gíslason
Jóhanna Ýr Jónsdóttir
Sonja Bergmann
Steindór Grétar Jónsson
Vilborg Ása Dýradóttir
Þorleifur Örn Gunnarsson
Ágúst Ólafur Ágústsson, varaformaður Samfylkingarinnar, var fundarstjóri á fundinum og ávarpaði Katrín Júlíusdóttir þingkona fundinn.
Í stofnfundarályktun félagsins er ríkisstjórnin gagnrýnd fyrir vanrækslu við Barna- og unglingageðdeild Landspítalans. Ályktunina má lesa í heild sinni hér fyrir neðan.
Myndir frá stofnfundum má sjá hér.
———
Stofnfundur Ungra jafnaðarmanna á Seltjarnarnesi telur vanrækslu ríkisstjórnarinnar við börn með geðraskanir fullkomlega ólíðandi. 170 börn bíða nú eftir plássi hjá Barna- og unglingageðdeild Landspítalans og er meðalbiðtíminn um eitt og hálft ár.
Samfylkingin vill eyða biðlistum á BUGL hið snarasta. Þetta kemur fram í sérstakri barnastefnu flokksins, Unga Íslandi. Ungir jafnaðarmenn á Seltjarnarnesi hvetja ungt fólk, og þá sérstaklega Seltirninga, til að styðja Samfylkinguna í baráttunni fyrir nægum plássum á BUGL fyrir börn sem eru hjálpar þurfi.