Heiða Björg Hilmisdóttir, borgarfulltrúi og varaformaður Samfylkingarinnar, tók við félagshyggjuverðlaunum Ungra jafnaðarmanna á landsþingi hreyfingarinnar nú um helgina. Hlaut Heiða Björg verðlaunin vegna óþreytandi baráttu hennar gegn kynbundnu ofbeldi og frumkvæði í tengslum við #MeToo-byltinguna.
Heiða Björg hefur staðið í forsvari fyrir #MeToo-byltinguna hér á landi, en hún hafði frumkvæði að stofnun Facebook-hóps þar sem íslenskar stjórnmálakonur deildu sögur af kynferðislegri áreitni og ofbeldi. Í kjölfarið komu í dagsljósið sögur fjölmargra hópa kvenna úr öllum stigum samfélagsins.
Heiða hefur einnig lagt mikla áherslu á baráttu gegn kynbundnu ofbeldi í starfi sínu í borgarstjórn Reykjavíkur. Hún átti frumkvæði að stofnun Ofbeldisvarnarnefndar Reykjavíkur og varð formaður hennar árið 2015. Nefndin hefur sett ofbeldismál rækilega á dagskrá borgaryfirvalda þannig að ofbeldisforvarnir eru oft til umræðu í borgarráði og borgarstjórn. Nefndin hefur einnig hrundið af stað verkefnum á borð við Bjarkarhlíð, miðstöð fyrir þolendur ofbeldis og hafið fræðslu á öllum skólastigum um ofbeldi og kynlíf. Þá hefur Reykjavíkurborg samþykkt aðgerðaráætlun gegn mansali og skipað teymi til að hindra að slíkt viðgangist.
Í starfi sínu í borgarstjórn Reykjavíkur og í forystu fyrir #MeToo hefur Heiða Björg átt þátt í að setja kynbundið ofbeldi á dagskrá íslenskra stjórnmála. Þrotlaus barátta hennar hefur breytt íslenskri jafnréttisumræðu til frambúðar og eiga íslenskar konur og samfélagið allt henni mikið að þakka.
