Við erum að kjósa um nýja stjórnarskrá. Þú hefur valdið að ráða þinni framtíð en til þess þarftu að standa upp úr sófanum! Það verða margar spurningar á kjörseðlinum á laugardaginn, en þú ræður algjörlega hvort þú svarar þeim. Þú svarar bara þeim sem þér finnast skipta máli.
En hvað þýðir það að taka þátt í þjóðaratkvæðagreiðslu um stjórnarskrá? Hvað er verið að spyrja um?
Það gæti þýtt að náttúruauðlindir landsins verði í eigu þjóðarinnar, s.s. að þjóðin geti ekki selt þær. Við eigum þær þá alltaf öll saman, -ekki bara sumir. Við heyrum um að Kínhverjar séu að kaupa upp vatnsréttindi í Afríku. Ef við breytum stjónarskránni á þennan hátt verður það ekki hægt á Íslandi, því þær auðlindir sem þjóðin á verður ekki hægt að selja.
Eiga öll atkvæði að vega jafnt eða á atkvæði þess sem býr á Vopnafirði að telja meira en þitt ef þú býrð á höfuðborgarsvæðinu? Það er ákveðið réttlætismál í lýðræðissamfélögum nútímans að rödd hvers og eins á að vega jafn þungt þegar kemur að sameiginlegri ákvarðanatöku.
Hvað finnst þér um að hafa þjóðkirkju í stjórnarskrá? Það eru ekki mjög lönd með þjóðkirkju í stjórnarskrá; -af Norðurlöndunum eru það við og Danir. Viltu geta kosið fólk en ekki flokka? Þetta eru stórar spurningar sem þarf að fá svör við. Það hefur ekki tekist í gegnum sögu lýðveldisins en nú hefur þjóðin tækifæri til að gera þessar stóru breytingar á stjórnskipun landsins.
Hvað sem það er sem þú vilt, þá þarftu að mæta og kjósa svo hlustað verði á þig!
Ég get lofað þér einu: Það hlustar enginn á þig ef þú situr heima! Mættu á kjörstað og hafðu raunveruleg áhrif!
