LEIÐARI Seðlabanki Íslands hefur engan trúverðugleika. Stærsta ástæðan núna er að honum stýrir fyrrum stjórnmálamaður með enga hagfræðimenntun. Hann hefur unnið Íslandi óendanlegan skaða með því að hypja sig ekki úr stöðunni.
Davíð Oddsson er með vesen í kringum brottvikningu sína. Hann gerir þetta til að orka Jóhönnustjórnarinnar og okkar allra beinist að flækjum í kringum þetta augljósasta mál sem til er. Ríkisstjórnin hefur ekki tíma fyrir þig, Davíð. Farðu áður en við töpum meiru á þér. Sjálfstæðisflokkur: Skammist ykkar fyrir að hylma yfir með honum. Það sjá allir í gegnum ykkur.
Seðlabanki Íslands hefur engan trúverðugleika. Stærsta ástæðan núna er að honum stýrir fyrrum stjórnmálamaður með enga hagfræðimenntun. Hann hefur unnið Íslandi óendanlegan skaða með því að hypja sig ekki úr stöðunni. Landið okkar fór á hausinn vegna efnahagsstjórnar hans og Sjálfstæðisflokksins. Þegar Davíð Oddsson segist ekki hafa hlaupist frá neinu verki, vil ég eiginlega ekki hugsa til þess hvað felist í því að klára það verk sem hann vinnur núna að.
Þessi fíll þarf að fara úr stofunni svo við getum þrifið hana. Ég hlakka mjög til þegar við getum öll hætt að tala um Davíð Oddsson.
Jóhanna og félagar í VG og Samfylkingu: Ég er fegin að Sjálfstæðisflokkurinn stendur ekki lengur í vegi fyrir nauðsynlegum umbótum á Seðlabankanum. Almenningur stendur á bak við ykkur. Gangi ykkur vel.
