LEIÐARI Það skiptir ótrúlega miklu máli fyrir ungt fólk að vel verði staðið að endurreisn Íslands, þannig að samfélagið verði jafnara og réttlátara á eftir. Fáum, ef nokkrum, er betur til þess treystandi en Jóhönnu Sigurðardóttur.
LEIÐARI Þrjár góðar ástæður til að kjósa Jóhönnu Sigurðardóttur áfram sem forsætisráðherra:
1. Jafnara Ísland. Það skiptir ungt fólk ótrúlega miklu máli að vel verði staðið að endurreisn Íslands, þannig að samfélagið verði jafnara og réttlátara á eftir. Fáum, ef nokkrum, er betur til þess treystandi en Jóhönnu Sigurðardóttur. Hún hefur á löngum ferli sínum alltaf barist fyrir því að jafna kjör fólks og aldrei gleymt þeim sem verst standa. Það er líka hægt að stóla á að hún komi hlutunum í verk!
2. Aðildarviðræður við ESB strax. Jóhanna Sigurðardóttir hefur oft lýst því yfir að það eigi að vera eitt af forgangsverkefnum næstu ríkisstjórnar að sækja um aðild að ESB. Við þurfum að sjá hvað út úr þeim aðildarviðræðum kemur og greiða síðan atkvæði um aðildarsamninginn. Það er kominn tími til!
3. Gegn spillingu. Jóhanna Sigurðardóttir flutti þingmál um fjármál stjórnmálaflokkanna í fimmtán ár samfleytt, alltaf gegn einarðri andstöðu Sjálfstæðisflokksins. Þegar upp komst um risastyrki FL group og Landsbankans til flokksins er alveg augljóst af hverju sú andstaða stafaði. Þau miklu tengsl íslensks viðskiptalífs og stjórnmála sem hafa viðgengist eru mikil tímaskekkja og hafa valdið okkur miklum skaða. Þess vegna er ótrúlega mikilvægt að núna taki við ríkisstjórn sem gætir þess að ekki falli allt í sama farið aftur. Jóhanna mun berjast gegn því, hér eftir sem hingað til.
Þess vegna er Jóhanna Sigurðardóttir rétt kona á réttum stað! Til þess að tryggja að hún verði áfram forsætisráðherra þurfum við að sameinast um að kjósa Samfylkinguna á laugardaginn.
