Bjarnveig Birta Bjarnadóttir og Stein Olav Romslo sigruðu forprófkjör Hallveigar, ungs jafnaðarfólks í Reykjavík, og eru því frambjóðendur félagsins í flokksvali Samfylkingarinnar í Reykjavík.
Kæra jafnaðarfólk
Ég heiti Bjarnveig Birta Bjarnadóttir, alltaf kölluð Birta, og býð mig fram í 3. sæti í prófkjöri Samfylkingar fyrir borgarstjórnarkosningar í vor. Ég er 33 ára rekstrarstjóri og þriggja barna móðir úr Grafarvogi.
Ég bý í Rimahverfi Grafarvogs með manninum mínum Pétri Frey Sigurjónssyni og börnunum okkar sem eru 2, 5 og 6 ára gömul. Ég hef starfað sem rekstrarstjóri hjá nýsköpunarfyrirtækið Tulipop undanfarin ár og er menntuð í viðskiptafræði ásamt stjórnun og stefnumótun. Ég ólst upp í Breiðholti með foreldrum mínum sem voru aðeins 16 ára þegar þau áttu mig. Við bjuggum í verkamannabústöðum hjá ömmu minni á meðan foreldrar mínir unnu láglaunastörf og sóttu sér menntun.
Ásamt því að vera stoltur fulltrúi úthverfanna hef ég þann heiður að vera fulltrúi ungs fólks. Ég sigraði í forprófkjöri Ungs jafnaðarfólks, ásamt Stein Olav, þar sem mörg hundruð ungmenni á aldrinum 16-35 ára greiddu mér atkvæði. Ég er þakklát fyrir þennan stuðning en verkefnið er stærra – og nú stefni ég í borgarstjórn fyrir hönd ungs fólks.
Ég ætla að berjast fyrir barnafjölskyldur
Sem móðir þriggja ungra barna þekki ég af eigin raun þær áskoranir sem barnafjölskyldur í borginni standa frammi fyrir. Á íbúðamarkaði, í leikskólum og í brasinu frá degi til dags. Ég veit hvað þarf til að auðvelda daglega lífið og ég ætla að berjast fyrir barnafjölskyldur í borgarstjórn.
Byggjum meira og hraðar. Sköpum rétta hvata fyrir verktaka og tryggjum fjölbreytt framboð af húsnæði svo að barnafjölskyldur geti komið þaki yfir höfuðið og stækkað við sig þegar þörf er á. Bilið milli fæðingarorlofs og leikskólavistar er óviðunandi fyrir foreldra, sérstaklega þá sem þurfa að vinna mikið og eru með minna milli handanna. Bætum starfsaðstæður í skólunum okkar, lögfestum leikskólastigið og stöndum með foreldrum.
Ég ætla að passa upp á reksturinn
Sem rekstrarstjóri hjá nýsköpunarfyrirtækinu Tulipop hef ég reynslu af því að passa upp á hverja krónu og velta við öllum steinum í rekstrinum. Tulipop er nýsköpunarfyrirtæki sem framleiðir hágæðaefni fyrir börn á íslensku.
Ég veit hvað þarf til að láta dæmið ganga upp. Það er ekki hægt að fara í öll verkefni, markaðsherferðir og vöruþróanir. Verum óhrædd við að forgangsraða verkefnum eftir mikilvægi.
Fjármagnið verður að nýta þar sem það raunverulega hefur áhrif. Hjá borginni eru ferlar orðnir flóknir og skriffinnska mikil. Það verður að vinda ofan af þessari þróun í þágu skilvirkni og velferðar borgarbúa.
Ég mun efla hverfi Reykjavíkur
Sem Breiðhyltingur sem býr núna í Grafarvogi þá get ég með sanni sagt að ég elska úthverfin okkar. Og ég vil beita mér fyrir því að Samfylkingin verði sterk í öllum hverfum borgarinnar og vinni að því að gera þau líflegri og eftirsóknarverðari.
Styrkjum hverfin með því að bæta grænu svæðin með leikvöllum og gróðri, efla Strætó og þjónustu í nærumhverfi. Sköpum hvata til að hefja fjölbreyttan rekstur inni í hverfunum samhliða því sem við lyftum sérkennum hverfanna.
Kjósum Birtu í borgina
Ég hvet þig til að skoða vefsíðuna mína bjarnveigbirta.is en þar má sjá greinar eftir mig, meðmæli, önnur málefni og fleira.
Ég vil taka þátt í að gera góða borg enn betri með því að berjast fyrir barnafjölskyldur, passa upp á reksturinn og efla úthverfin. Samfylkingin getur unnið glæsilegan sigur í borgarstjórnarkosningum vor. Jafnaðarstefnan stendur fyrir sínu og margt hefur gengið vel. En við þurfum ný augu, skýra forgangsröðun og fólk sem þekkir vandamálin af eigin raun. Ég óska eftir þínum stuðningi í 3. sæti.
Kjósum Birtu í borgina!
Ég er 32 ára stærðfræðikennari og norskur sveitastrákur. Ég er fæddur og uppalinn í bæ sem heitir Ål í Hallingdal í Noregi en ég flutti til Íslands sumarið 2018. Ég lauk meistaragráðu í stærðfræði frá Norska Tækniháskólanum í Þrándheimi. Fyrst lærði ég íslensku í Háskóla Íslands, svo fékk ég vinnu í Hagaskóla og er búinn að vera þar síðan. Þar hef ég tekið að mér mörg og stór hlutverk, meðal annars hef ég verið teymisstjóri árgangateyma, fagstjóri í stærðfræði, umsjónarkennari og leiðtogi þróunarverkefna. Ég hef fengið hvatningarverðlaun borgarinnar fyrir þróunarverkefni um lesskilning og tekið þátt í rannsóknarverkefni Menntavísindasviðs HÍ til að bæta gæði kennslu.
Virkur í grasrótinni
Árið 2020 byrjaði ég í Samfylkingunni og hef á síðustu rúmum 5 árum gegnt ýmsum hlutverkum innan flokksins. Ég hef verið virkur félagi í Hallveigu og Ungu jafnaðarfólki og sat meðal annars í miðstjórn UJ. Árin 2021-2023 sat ég í stjórn Samfylkingarfélagsins í Reykjavík, fyrst sem meðstjórnandi og síðar sem gjaldkeri. Í dag gegni ég hlutverki ritara framkvæmdastjórnar Samfylkingarinnar og er á mínu öðru kjörtímabili í framkvæmdastjórn. Þangað til íbúaráðin voru lögð af síðasta vor gegndi ég formennsku í íbúaráði Vesturbæjar.
Ekki pabbi, heldur pappa
Fyrir ári varð ég pabbi (eða pappa eins og dóttir okkar kallar mig) og við fjölskyldan höfum fetað okkur í nýjum veruleika. Það er yndislegt að kynnast litlum einstaklingi og lifa og læra saman á hverjum degi. Samstundis upplifðum við óöryggið sem það er að geta ekki treyst á að fá pláss í leikskóla borgarinnar við lok fæðingarorlofs. Foreldrar þurfa því miður að leita skapandi lausna til að láta hversdagsleikann ganga upp en það eru ekki öll í þeirri forréttindastöðu að geta gert ráð fyrir að „þetta reddist“ einhvern veginn. Þannig á þetta líka bara alls ekki að vera. Leikskólar eru grunnstofnanir borgarinnar og án þeirra færi samfélagið á hliðina. Nýr veruleiki okkar minnti okkur rækilega á það hvað nærumhverfið og þjónusta sveitarfélaga spilar stórt hlutverk í lífi fjölskyldunnar. Það verður alltaf að vera forgangsatriði borgarinnar að tryggja íbúum sínum grunnþjónustu. Því einmitt þannig tryggjum við jöfnuð í samfélaginu okkar.
Tökum betur og miklu fyrr utan um börn og ungmenni
Ég hef reynslu af gólfinu sem kennari í hátt í áratug og hef því mikilvæga innsýn inn í stöðu skólanna okkar. Verkefni skólanna eru fjölbreytt og af þannig stærðargráðu að við þurfum fleira fólk í skólana með fjölbreytta reynslu og þekkingu. Við verðum að hlúa betur að börnunum okkar, sérstaklega þeim sem eru í viðkvæmri stöðu. Það er að mínu mati eitt stærsta verkefni okkar að tryggja að börnum og ungmennum líði vel. Gott fyrsta skref væri að tryggja aðgengi að sálfræðingum innan veggja skólanna sem sinna lágþröskuldaþjónustu. Ég vil grípa betur inn í þegar nemendur þurfa stuðning, bæði í námi og félagslega – áður en vandamál og áhyggjur yfirtaka stóran hluta lífs þeirra.
Tungumálið opnar dyr: jöfn tækifæri með öflugri íslenskukennslu
Það þarf meira fjármagn í íslenskukennslu fyrir börn með annað móðurmál en íslensku og sömuleiðis fyrir erlent starfsfólk borgarinnar. Ég þekki það á eigin skinni hvað það er mikilvægt að við sem erum af erlendum uppruna fáum tækifæri til að læra íslensku vel. Aukin stoðþjónusta þegar kemur að íslenskukennslu fyrir bæði börn og starfsfólk í Reykjavík verða að vera forgangsmál hjá Samfylkingunni.
Verðugur fulltrúi jafnaðarfólks
Ég hef einlægan áhuga á að halda áfram að gera borgina okkar enn betri. Ég tæki með mér mikla reynslu og þekkingu úr kennarastarfinu og víðar sem er dýrmæt í borgarstjórn og tel að ég yrði verðugur fulltrúi jafnaðarfólks í borgarstjórn. Því sækist ég eftir ykkar stuðningi í 4. sæti í prófkjöri Samfylkingarinnar fyrir borgarstjórnarkosningar 2026.
