Áttavillt ungt fólk

aldreiforegsudurPISTILL Í stuttum samtölum við fólk inn á milli brjálaðra rokktónleika kom í ljós að fólk er enn afskaplega áttavillt í þessum dýragarði stjórnmálanna. Það veit enginn venjulegur maður hvað á að gera og af hverju. aldreiforegsudurPISTILL Ungir jafnaðarmenn fóru saman í stórum hóp til Ísafjarðar á hina frábæru rokkhátíð Aldrei fór ég suður nú um páskahelgina. Óhætt er að segja að stemmingin í hópnum hafi verið mögnuð, drifkraftur og góður andi sveif yfir vötnum og hópurinn þétti sig vel fyrir lokahnykkinn í kosningabaráttunni. Sjaldan hafa verið haldin jafn góð partí og í íþróttasalnum sem við gistum í og ég myndi mæla með því að mæta á þær uppákomur sem við munum halda á næstu vikum til að upplifa alvöru stemmingu og gleði.

Það eru líka annars konar partí sem mér finnst að fólk ætti að mæta í og fagna en meira um það síðar.

Mér sjálfri hefur sjaldan liðið jafn vel að tilheyra nokkrum hóp, það er svo gott að finna skoðanasystkini sín og geta rætt um daginn og veginn án þess að rífast endalaust og rökræða. Þess vegna hvet ég alla sem hafa skoðanir á heiminum að finna sér skoðanasystkini og rækta þau sambönd, sama hvar skoðanir þeirra liggja.

Í stuttum samtölum við fólk inn á milli brjálaðra rokktónleika kom í ljós að fólk er enn afskaplega áttavillt í þessum dýragarði stjórnmálanna. Það veit enginn venjulegur maður hvað á að gera og af hverju. Það lítur út fyrir að fólk þurfi að setja sig svo vel inn í hlutina til að átta sig á hvað er vont og hvað er gott við ESB, hvernig sé best að rétta úr kútnum og lifa eðlilegu lífi.

Það sem ég veit hinsvegar sem mjög svo venjuleg stelpa sem skil ekkert í öllum þessu flóknu orðum og hugtökum er að Samfylkingin leggur áherslu á vinnu og velferð í komandi kosningum og við í ungliðahreyfingunni erum afskaplega dugleg að ýta á forystuna með þau mál sem skipta okkur mestu máli. Við viljum Evrópusambandið því að við trúum því að þar sé hagsmuna okkar best gætt. Ég get ekki setið á mér og spurt hvers vegna nánast öll ríki Evrópu þrá að komast inn í þetta snilldarsamband en einhverjir á Íslandi eru tvístígandi? Af hverju getum við ekki fengið samning, sett skilyrði eins og í sjávarútveginum og tekið þátt í allsherjarpartíinu sem ríkir um Evrópu? (en það er jú fyrrnefnt partí sem ég vil að við allir mæti í og þeir sem voru á Ísafirði vita hversu góð partí jafnaðarmenn halda!)

Við erum öll orðin dauðþreytt á spillingu og kreppu, flokkum sem vondar fréttir hætta ekki að koma frá og ógeðslega háu matarverði. Ég vil bara lifa góðu lífi án þess að þurfa að pirra mig í hverjum einasta fréttatíma yfir íslensku samfélagi. Það væri gott að fá fólk með okkur í lið sem er ekki skylt okkur í 4. ættlið en hefur okkur þó með í ákvarðanatöku – það verður ekkert gert í okkar landi án okkar samþykkis.

Ég átta mig á að þessi grein er ekki sú sem útskýrir öll málefnin og opnar augu allra en hún fær kannski einhvern til að drífa sig út á næstu kosningamiðstöð, segja hæ og byrja að velta stjórnmálunum fyrir sér. Fólkið í Skólabrú mun taka vel á móti ykkur. Kynnið ykkur málin vel unga fólk, kjósið það sem mun gera framtíð ykkar sem bjartasta og ég lofa ykkur því að eftir að hafa rætt þetta við alla flokka munið þið sjá ljósið sem Evrópusambandið lýsir.

Deila

Facebook
Twitter
Ungir jafnaðarmenn

Nýlegar færslur