Í síðastliðinni viku fóru nokkrir fulltrúar UJ í heimsókn til Össurar Skarphéðinssonar, Utanríkisráðherra til þess að ræða alþjóðamál og þakka sérstaklega fyrir vasklega framgöngu hans í ræðu sem hann flutti nýverið í Sameinuðu þjóðunum.
Hér að neðan má sjá bréfið í heild sinn.
Kæri Össur,
Ungir jafnaðarmenn, vilja færa þér innilegar þakkir og virðingu okkar fyrir þá djörfu ræðu sem þú fluttir á allsherjarþingi Sameinuðu þjóðanna í New York 29. september síðastliðinn. Það skiptir máli að rödd friðar heyrist skýrt og greinilega á þessum vettvangi.
Sama dag og þú hélst ræðu þína í New York héldu Ungir jafnaðarmenn landsþing. Þar samþykktum meðal annars eftirfarandi yfirlýsingu: „Ungir jafnaðarmenn hvetja núverandi ríkisstjórn og þær sem á eftir koma til þess að vera ávallt talsmenn friðar á alþjóðavettvangi og beiti sér fyrir því að mannréttindi séu virt í hvívetna. Ungir jafnaðarmenn vilja alheimsfrið.“
Við erum afar stolt af því að geta sagt að utanríkisráðherra okkar sé óhræddur við að halda ræðu í þessum anda á þessum stóra vettvangi.
Virðingarfyllst Ungir jafnaðarmenn
