Lög Ungra jafnaðarmanna

I. Heiti, heimili og markmið
1. grein
Nafn samtakanna er Ungir jafnaðarmenn og eru samtökin ungliðahreyfing Samfylkingarinnar. Heimili þeirra og varnarþing er í Reykjavík.

Enginn getur skuldbundið samtökin fjárhagslega án samþykkis gjaldkera, formanns eða framkvæmdastjóra sé slíkur starfandi.

2. grein
Samtökin eru opinn og lýðræðislegur vettvangur fyrir skapandi umræður og félagsstarf ungs jafnaðar- og félagshyggjufólks.

Samtökin hafa það markmið að efla nýsköpun og frumkvæði ungs jafnaðar- og félagshyggjufólks með því að stofna til víðtækra skoðanaskipta, umræðna og málefnavinnu, einkum í málaflokkum sem varða líf ungs fólks, sem byggja á grunnhugmyndum jafnaðarstefnunnar um frelsi, jafnrétti, og bræðralag.

Samtökin hafa það markmið að auka samskipti og samkennd ungs jafnaðar- og félagshyggjufólks með öflugu félagsstarfi og útgáfu.

Samtökin aðhyllast lýðræðislegt þjóðskipulag byggt á virkri þátttöku almennings, valddreifingu, fyllstu mannréttindum og félagslegu réttlæti.

II. Aðild að Ungum jafnaðarmönnum
3. grein
Aðild að samtökunum geta átt öll félög og málefnahópar ungs fólks á aldrinum 16 – 35 ára sem vilja vinna að framgangi félagshyggju og jafnaðarstefnu og gangast undir lög þessi.

Þau félög eða málefnahópar sem óska þess að gerast aðilar skulu senda inn inntökubeiðni sem skulu fylgja afrit af lögum og félagaskrá. Landsþing skal taka afstöðu til inntökubeiðni og samþykkja hana eða hafna.

Til að félög eða málefnahópar fái inngöngu í Unga jafnaðarmenn þarf tvo þriðju hluta atkvæða á landsþingi. Meðan beðið er úrskurðar landsþings um inntökubeiðni félags getur framkvæmdastjórn samþykkt, með einföldum meirihluta, að veita félaginu aukaaðild fram að landsþingi. Félagsmenn hins nýja félags geta þá starfað innan samtakanna en hafa ekki atkvæðisrétt á landsþingi nema landsþing samþykki inngöngubeiðni félagsins, sbr. 12. gr.

4. grein
Hvert aðildarfélag, það er félag eða málefnahópur, hefur rétt til að skjóta ágreiningsmálum til miðstjórnar, enda hafi ágreiningsmálið verið rætt á félagsfundi og atkvæðagreiðsla gengið um málið.

Úrskurður miðstjórnar er bindandi fyrir alla aðila en honum má áfrýja til landsþings.

Úrskurður miðstjórnar gildir þangað til landsþing úrskurðar í málinu.

5. grein
Aðildarfélög skulu senda miðstjórn skýrslu um starfsemi sína, uppfærða félagatölu og fjárhag að loknum hverjum aðalfundi. Aðildarfélög skulu jafnframt senda miðstjórn uppfærða félagatölu fjórum sólarhringum fyrir landsþing.

Miðstjórn getur óskað eftir slíkum gögnum á öðrum tímum ef þurfa þykir.

6. grein
Brjóti aðildarfélag reglur, samþykktir eða lög samtakanna eða geri eitthvað það sem landsþing telur til vansa fyrir samtökin skal landsþing heimilt að víkja því úr samtökunum.

Miðstjórn getur fellt úrskurð um brottvikningu fram að landsþingi ef meira en þrír mánuðir eru fram að landsþingi.

7. grein
Einstakir félagsmenn geta verið í fleiri en einu félagi eða málefnahóp. Þeir skulu þó aldrei telja oftar en einu sinni í félagaskrá samtakanna. Enginn félagsmaður getur haft meira en einfaldan atkvæðisrétt óháð fjölda þeirra félaga og málefnahópa sem viðkomandi er aðili að.

8. grein
Hvert aðildarfélag hefur rétt til að svipta félaga sinn félagsréttindum og víkja honum úr félaginu um óákveðinn tíma ef hann hefur á einhvern hátt gert sig sekan um brot á lögum eða reglum félags, samtaka eða stjórnmálaflokks samtakanna.

Viðkomandi skal ávallt gefinn kostur á að leggja fram málsvörn og getur hann skotið máli sínu til miðstjórnar samtakanna sem kveður upp endanlegan úrskurð.

III. Landsþing
9. grein
Landsþing fer með æðsta vald í málefnum Ungra jafnaðarmanna. Landsþing skal halda árlega og skal að jafnaði halda eigi síðar en 15. október.

10. grein
Landsþing skulu boðuð af framkvæmdastjórn skriflega og/eða með tölvupósti til aðildarfélaga og með fréttatilkynningu minnst tíu sólarhringum áður en þau eru haldin. Í tilkynningunni komi fram dagsetning og fundarstaður landsþings liggi hann fyrir. Dagskrá landsþings skal auglýst í dagblöðum eða á heimasíðu samtakanna a.m.k. viku áður en landsþing hefst.

Aukalandsþing skal halda ef meirihluti miðstjórnar eða fimmtungur félagsmanna telur ástæðu til og sitja þeir embættismenn sem þar eru kosnir fram að næsta reglulega landsþingi.

Landsþing telst löglegt ef það er löglega boðað.

11. grein
Hvert aðildarfélag á rétt að að senda fulltrúa með fullum réttindum á landsþing Ungra jafnaðarmanna. Fjöldi fulltrúa hvers aðildarfélags skal vera einn fyrir hverja tíu félaga aðildarfélagsins. Fulltrúarnir hvers aðildarfélags skulu þó aldrei verða færri en tíu og aldrei fleiri en 45% af þeim fjölda sem öllum aðildarfélögunum er heimilt að senda. Fulltrúar skulu hafa verið skráðir til mætingar a.m.k. fjórum dögum fyrir landsþing.

12. grein
Dagskrá landsþings er eftirfarandi:

Afhending þinggagna og greiðsla þinggjalda.

Setning.

Kosning starfsmanna þingsins, forseta, þingritara og uppstillingarnefnd telji miðstjórn þörf á því.

Afstaða tekin til inntökubeiðni nýrra félaga eða málefnahópa.

Skýrsla stjórnar og umræður.
Skýrsla gjaldkera og umræður, samþykkt reikninga.

Umræða og afgreiðsla ályktana.
Lagabreytingar.

Kosning í embætti.: Framkvæmdastjórn: Formaður, varaformaður, gjaldkeri, fræðslustjóri, málefnastjóri, alþjóðaritari og útgáfustjóri. Miðstjórn: Kosning átta miðstjórnarfulltrúa og fjögurra varamanna. Tveir endurskoðendur reikninga

Önnur mál.

Þingslit.

13. grein
Úrslitum mála á landsþingi ræður einfaldur meirihluti greiddra atkvæða nema kveðið sé á um annað í lögum þessum.

Framkvæmdastjórn skipar 2-4 einstaklinga í kjörstjórn sem sér um kosningarnar á landsþingi. Framboð skulu hafa borist kjörstjórn fyrir hádegi á fyrsta þingdegi landsþings nema annað sé auglýst.

Berist ekki mótframboð í embætti er sjálfkjörið í það embætti.

Við kosningar eru þeir réttkjörnir sem flest atkvæði fá. Verði atkvæði jöfn í framboðskosningum þá ræður hlutkesti. Þó skal formaður vera kosinn með meira en helming greiddra atkvæða. Hljóti enginn slíkan atkvæðafjölda við formannskosningu skal kosið á ný milli tveggja efstu frambjóðanda. Auðir seðlar teljast greidd atkvæði.

Allar kosningar á landsþingi skulu vera skriflegar sé þess sérstaklega óskað.

Öll embætti samtakanna eru kosin til eins árs í senn nema annað sé tekið fram.

14. grein
Heimilt er að innheimta þinggjöld af fulltrúum til að standa undir kostnaði þeim sem hlýst af landsþingi. Einnig er heimilt að innheimta gjald til jöfnunar ferðakostnaðar.

Framkvæmdastjórn skal taka ákvörðun um hvort og hvernig heimildirnar verði nýttar og tilkynna það tíu sólarhringum áður en landsþing hefst.

IV. Framkvæmdastjórn
15. grein
Miðstjórn Ungra jafnaðarmanna fer með æðsta vald samtakanna milli landsþinga.

Framkvæmdastjórn sér um daglegan rekstur samtakanna.

16. grein
Í miðstjórn eiga sæti allir fulltrúar í framkvæmdastjórn Ungra jafnaðarmanna, átta meðstjórnendur kosnir á landsþingi ungra jafnaðarmanna sem og sex kjördæmafulltrúar. Heimild til setu á fundum miðstjórna hafa einnig allir formenn aðildarfélaga Ungra jafnaðarmanna.

Varamenn taka sæti á miðstjórnarfundum í forföllum kjörinna aðalmanna. Atkvæðafjöldi á landsþingi ræður því í hvaða röð varamenn taka sæti í stjórn. Hafi varamenn verið sjálfkjörnir skal dregið um það á fyrsta fundi nýrrar miðstjórnar í hvaða röð varamenn taka sæti á fundum miðstjórnar.

Í framkvæmdastjórn sitja formaður, varaformaður, gjaldkeri, fræðslustjóri, málefnastjóri, útgáfustjóri og alþjóðafulltrúi. Einstakir fulltrúar í framkvæmdastjórn bera ábyrgð á þeim verkefnum sem þeim er falið gagnvart framkvæmdastjórn.

Á fyrsta fundi miðstjórnar skulu kjörnir fjórir varamenn framkvæmdastjórnar úr hópi þeirra átta fulltrúa sem kosnir voru á landsþingi. Skal miðstjórn velja þessa varamenn á fyrsta fundi sínum eftir landsþing. Varamenn þessir skulu taka sæti á framkvæmdastjórnarfundum í forföllum kjörinna aðalmanna. Atkvæðafjöldi á fyrsta fundi miðstjórnar ræður því í hvaða röð varamenn taka sæti í stjórn. Hafi varamenn verið sjálfkjörnir skal dregið um það á þessum sama fundi í hvaða röð varamenn taka sæti á fundum framkvæmdastjórnar.

Framkvæmdastjórn ber ábyrgð á verkum sínum gagnvart miðstjórn og skal lúta eftirliti miðstjórnar með störfum sínum.

17. grein
Miðstjórn sér um grundvallar stefnumótun félagsins, ber ábyrgð á ályktunum félagsins, ber ábyrgð á framkvæmd ákvarðana landsþings og hefur eftirlit með störfum framkvæmdastjórnar. Miðstjórn getur falið framkvæmdastjórn að sinna þeim verkefnum sem talin eru nauðsynleg hverju sinni.

Framkvæmdastjórn sér um daglegan rekstur samtakanna, annast tengsl við aðildarfélög, vinnur að eflingu starfsins um land allt og ber ábyrgð á þeim verkefnum sem einstökum fulltrúum framkvæmdarstjórnar er falið að sinna. Framkvæmdarstjórn skal einnig sinna þeim verkefnum sem henni eru falin af miðstjórn.

Framkvæmdastjórn hefur rétt til að ráða framkvæmdastjóra sér til aðstoðar. Skal ráðning framkvæmdastjóra staðfest af miðstjórn áður en hún tekur gildi.

18. grein
Miðstjórnarfundi skal halda a.m.k. einu sinni í mánuði. Formaður fer með oddaatkvæði ef atkvæði verða jöfn. Miðstjórnarfundi skal að jafnaði boða með tveggja sólarhringa fyrirvara. Óski fjórðungur miðstjórnar eftir fundi ber að halda hann innan viku frá því formanni berst slík ósk skriflega.

Miðstjórnarfundir skulu opnir formönnum aðildarfélaga, formönnum málefnanefnda og formanni stjórnar menntaskólaráðs Ungra jafnaðarmanna, sem sitja fundi með málfrelsi og tillögurétt.

Miðstjórn er auk þess frjálst að veita trúnaðarmönnum samtakanna og öðrum gestum aðgang að fundum sínum með málfrelsi og tillögurétti.

Framkvæmdastjórnarfundi skal að jafnaði halda einu sinni í viku. Formaður fer með oddaatkvæði ef atkvæði verða jöfn. Framkvæmdarstjórnarfundi skal að jafnaði boða með tveggja sólarhringa fyrirvara.

Framkvæmdastjórn er frjálst að veita einstökum félagsmönnum Ungra jafnaðarmanna aðgang að fundum sínum með málfrelsi og tillögurétt.

19. grein
Eftirtaldir embættismenn Ungra jafnaðarmanna sitja í framkvæmdastjórn samtakanna. Ber hver fulltrúi i framkvæmdastjórn ábyrgð á þeim verkefnum sem honum eru falin í lögum þessum.

Formaður er málsvari Ungra jafnaðarmanna. Skal formaður boða til funda miðstjórnar og framkvæmdastjórnar.

Varaformaður er staðgengill formanns. Varaformaður ber ábyrgð á innra starfi samtakanna og skal m.a. halda utan um félagatölu samtakanna. Varaformaður skal hafa beint samband við nýskráða félaga.

Gjaldkeri skal stunda ábyrga fjármálastjórn. Gjaldkeri skal mánaðarlega kynna fjárhagsstöðu samtakanna á miðstjórnarfundum.

Fræðslustjóri er fulltrúi samtakanna við skipulagningu á Stjórnmálaskóla Samfylkingarinnar. Fræðslustjóri skal halda utan um bókasafn Ungra jafnaðarmanna og skal m.a. halda eftir eintaki af öllu því efni sem samtökin gefa út. Fræðslustjóri ber ábyrgð á að haldin sé fundargerð á fundum framkvæmdastjórnar og miðstjórnar og að þær fundargerðir séu sendar út.

Alþjóðaritari ber ábyrgð á alþjóðasamstarfi Ungra jafnaðarmanna á hverjum tíma. Honum ber að fylgjast með fréttum og tilkynningum sem berast frá alþjóðlegum samtökum sem Ungir jafnaðarmenn eiga aðild að. Alþjóðaritari skal hverju sinni í samráði við formann útbúa tillögu um hverjir verði fulltrúi/ar samtakanna á alþjóðlegum samkomum. Árlegur Evrópudagur Ungra jafnaðarmanna skal vera skipulagður af alþjóðaritara. Alþjóðaritari skal mánaðarlega kynna stöðu samtakanna í alþjóðasamstarfi á framkvæmdastjórnarfundum.

Málefnastjóri skal hafa yfirsýn yfir allt málefnastarf Ungra jafnaðarmanna og bera ábyrgð á því að það starf sé í samræmi við hugmyndafræði samtakanna. Málefnastjóri skal vera tengiliður á milli miðstjórnar og málefnahópa samtakanna. Málefnastjóri fylgist með málefnastarfi aðildarfélaga fyrir hönd framkvæmdastjórnar og veitir aðildarfélögum aðstoð við málefnastarf sé þess óskað.

Útgáfustjóri ber ábyrgð á öllum útgáfumálum Ungra jafnaðarmanna. Útgáfustjóri er ábyrgðarmaður blaðs Ungra jafnaðarmanna, Jöfn og frjáls, sem og vefrits Ungra jafnaðaramanna, Pólitík.is, og skal hann tryggja að útgáfa þessara fjölmiðla sé í samræmi við lög þessi. Útgáfustjóri ber einnig ábyrgð á að halda uppi virkum greinarskrifum félagsmanna í dagblöð og tímarit sem gefin eru út hér á landi.

19. gr. A.
Landsþing kýs átta fulltrúa í miðstjórn, sbr. 16. gr. Þessir fulltrúar skulu m.a. sinna og bera ábyrgð á eftirfarandi verkefnum.

Halda utan um sýnileika Ungra jafnðarmanna í innra starfi Samfylkingarinnar, halda utan um og kynna miðstjórn þau helstu mál sem liggja fyrir Alþingi hverju sinni, halda utan um og kynna miðstjórn þau helstu mál sem eru til umræðu í sveitarstjórnum landsins hverju sinni í samráði við einstök aðildarfélög, halda utan um samskipti við aðrar ungliðahreyfingar og æskulýðsfélög, halda utan um heimsóknir Ungra jafnaðarmanna í framhaldskóla á landinu, hafa eftirlit með meðferð framkvæmdastjórnar á fjármunum samtakanna, halda utan atburði þá sem samtökin standa fyrir hverju sinni og sjá um stærri málþing og málfundi.

Þessum verkefnum skulu miðstjórnarfulltrúar sinna í samstarfi við framkvæmdastjórn og þá fulltrúa framkvæmdastjórnar sem við á hverju sinni. Skal a.m.k. einn miðstjórnarfulltrúi bera ábyrgð á hverju þessara verkefna og skiptir miðstjórn með fulltrúunum verkum.

Miðstjórn getur falið einstökum fulltrúum að sinna öðrum verkefnum eftir þörfum. Miðstjórnarfulltrúar geta einnig tekið að sér verkefni að eigin frumkvæði í samráði við miðstjórn.

20. grein
Miðstjórn sker úr um deilumál sbr. 4. grein og 6. grein, tekur stefnumál til meðferðar og skipar í þau embætti sem kunna að losna á milli landsþinga.

Miðstjórn getur sent frá sér ályktanir um málefni sem eru í anda samþykktrar stefnu samtakanna, sbr. 17. gr.

V. Málefnanefndir
21. grein
Framkvæmdastjórn ber að skipa og starfrækja málefnanefndir milli landsþinga um helstu málaflokka. Málefnanefndir móta stefnu samtakanna í hinum ýmsu málum. Málefnanefndir skulu vera skipaðar a.m.k. formanni og varaformanni. Miðstjórn skal staðfesta skipun formanns hverrar nefndar sérstaklega, að tillögu málefnastjóra.

Málefnanefndir skulu vera að lágmarki fjórar. Málefnastjóri ber ábyrgð á starfi málefnanefnda gagnvart framkvæmdastjórn.

Stjórnir málefnanefnda eru ábyrgar fyrir starfi einstakra nefnda en öllum félagsmönnum aðildarfélaga er heimilt að taka þátt í starfi þeirra.

Stjórnir málefnanefnda skulu halda fundi svo oft sem þurfa þykir. Hver stjórn skal standa fyrir að minnsta kosti einum opnum fundi á ári og skulu þeir kynntir félagsmönnum með auglýsingum hvort sem er í fjölmiðlum eða á vefriti samtakanna.

VI. Kjördæmisráð
22. grein
Í kjördæmum þar sem starfa tvö eða fleiri aðildarfélög samtakanna skulu þau mynda með sér kjördæmisráð. Kjördæmisráð skulu kjósa sér formann. Kjördæmisráð skulu einnig kjósa sérstakan fulltrúa til setu í miðstjórn sbr. 16. grein. Hvert kjördæmi skal hafa einn fulltrúa í miðstjórn.

Aðeins eitt kjördæmisráð skal vera í allri Reykjavík og skipar það ráð sitt hvorn kjördæmafulltrúann fyrir Reykjavíkurkjördæmi norður og Reykjavíkurkjördæmis suður. Kjördæmisráð eru samstarfsvettvangur aðildarfélaga í hverju kjördæmi og skulu þau vinna að sameiginlegum markmiðum aðildarfélaganna jafnt innan kjördæmis sem út á við.

Kjördæmisráð skal tilkynna formanni Ungra jafnaðarmanna hver hefur verið valinn kjördæmafulltrúi ráðsins eigi síðar en á fyrsta fundi miðstjórnar eftir landsþing.

23. grein
Í kjördæmisráði sitja formenn aðildarfélaga í viðkomandi kjördæmi.

Aðalfundur kjördæmisráðs skal haldinn árlega.

24. grein
Kjördæmisráð skulu setja sér lög um starfshætti og senda þau landsþingi samtakanna til staðfestingar.

VII. Útgáfumál

25. grein
Samtökin skulu halda úti vefritinu Pólitík.is og gefa út árlega a.m.k. eitt tölublað af blaði Ungra jafnaðarmanna – Jöfn og frjáls.

Miðstjórn er heimilt að fela framkvæmdastjórn að standa að frekari útgáfu í nafni samtakanna.

Öll útgáfa Ungra jafnaðarmanna skal endurspegla markmið og stefnu samtakanna sbr. 2. gr.

26. grein
Útgáfustjóri er ábyrgðarmaður allrar útgáfu samtakanna. Miðstjórn er heimilt að skipa sérstakan ritstjóra, yfir Pólitík.is og Jöfn og frjáls, að tillögu útgáfustjóra. Framkvæmdastjórn er heimilt að skipa ritstjórn í samráði við útgáfustjóra og ritstjóra hafi slíkur verið skipaður. Sé sérstakur ritstjóri skipaður, yfir Pólitík.is eða Jöfn og frjáls, skal útgáfustjóri eiga sæti í ritstjórn.

27. grein
Sé sérstök ritstjórn skipuð ákveður ritstjórn sjálf verkaskiptingu ritstjórnarfulltrúa. Útgáfustjóri er fulltrúi ritstjórnar í framkvæmdastjórn, sbr. 16. gr og 26. gr. Ritstjórn ákveður ritstjórnarstefnu innan markmiða samtakanna sbr. 2. grein.

28. grein
Framkvæmdastjórn getur vikið ritstjórn frá greiði meirihluti framkvæmdastjórnar með því.

VIII. Menntaskólaráð Samfylkingarinnar

29. grein
Ungir jafnaðarmenn skulu halda starfandi menntaskólaráði Samfylkingarinnar.

Menntaskólaráð er samstarfsvettvangur Ungra jafnaðarmanna í framhaldsskólum og skal það vinna að sameiginlegum markmiðum framhaldsskólanema.

Menntaskólaráð skal skipað einum tengilið af hvoru kyni hverjum framhaldsskóla á landinu. Menntaskólaráð skal koma saman ekki sjaldnar en einu sinni á misseri. Framkvæmdastjórn skipar tengiliði í hverjum skóla í samvinnu við stjórn menntaskólaráðs. Tengiliðir í menntaskólaráði annast tengsl við aðildarfélög á hverjum stað og vinna að kynningu og eflingu Ungra jafnaðarmanna í hverjum skóla.

30. grein
Starfsemi menntaskólaráðs skal skipulögð af sjö manna stjórn sem kosin er á landsþingi og skal sá sem flest atkvæði hlýtur gegna formennsku í stjórninni. Skal formaður boða til fund og skulu þeir haldnir ekki sjaldnar en einu sinni í mánuði. Stjórn menntaskólaráðs ber ábyrgð á að menntaskólaráð komi saman. Formaður situr í framkvæmdastjórn með málfrelsi og tillögurétt, sbr. 18. gr.

Stjórn menntaskólaráðs vinnur að eflingu Ungra jafnaðarmanna innan framhaldsskóla í samvinnu við tengiliði í hverjum skóla.

IX. Lagabreytingar og lögskýringanefnd
31. grein
Lögum þessum er aðeins hægt að breyta á landsþingi. Tillögur til lagabreytinga skulu berast skrifstofu minnst fjórum sólarhringum fyrir upphaf landsþings og skulu þær liggja frammi til kynningar á skrifstofu samtakanna síðustu tvo sólarhringa fyrir landsþing.

Tvo þriðju hluta atkvæða á landsþingi þarf til að lagabreytingatillögur fái samþykki.

X. Gildistaka
32. grein
Lög þessi öðlast þegar gildi.

Bráðabirgða ákvæði:

Á landsþingi Ungra jafnaðarmanna 2008 skal ekki kosið sérstaklega um embætti varamanna í miðstjórn heldur skulu þeir sem ekki ná kjöri til miðstjórnar taka sæti varamanna í samræmi við fjölda atkvæða. Verði ekki fjórir varamenn eftir kosningu á landsþinginu er miðstjórn heimilt að skipa varamenn í samræmi við 20. gr.

Lögum þessum var síðast breytt á landsþingi Ungra jafnaðarmanna í Reykjavík 4. og 5. október 2008.