Ungir jafnaðarmenn gagnrýna harðlega ummæli sem Sigmundur Davíð Gunnlaugsson, forsætisráðherra, lét falla í Bítinu á Bylgjunni í morgun, 16. nóvember.

Í viðtalinu í Bítinu varaði Sigmundur Davíð m.a. við því að meðal flóttafólks gætu reynst “hættulegir menn”. Ungir jafnaðarmenn telja ummæli Sigmundar Davíðs til þess fallin að auka á ótta og tortryggni í garð flóttamanna. Flóttamenn eru þolendur sama ofbeldisins og íbúar París urðu fyrir á föstudagskvöld. Því telja Ungir jafnaðarmenn til háborinnar skammar að forsætisráðherra tengi flóttamenn við slík hryðjuverk.

Ábyrgð stjórnmálaleiðtoga er mikil í aðstæðum sem þessum og orð forsætisráðherra vega þungt í umræðunni. Það er gríðarlega óábyrgt og getur verið stórhættulegt að leiðtogi ríkisstjórnarinnar tali með þessum hætti við þjóðina í kjölfar verstu hryðjuverkaárásar í Evrópu í áratug. Þessi orðræða ýtir undir tortryggni í garð flóttamanna og hælisleitenda og hún getur orðið vatn á myllu þeirra sem vilja loka landinu í nafni útlendingahaturs. Við höfum séð hræðilegar birtingarmyndir slíks haturs í löndunum í kringum okkur, þar sem ítrekað hafa verið gerðar árásir á miðstöðvar fyrir hælisleitendur og flóttafólk.

Ungir jafnaðarmenn beina því til forsætisráðherra og annarra stjórnmálamanna að velja orð sín af varfærni.

Miðstjórn Ungra jafnaðarmanna, 16.11.2015